БМТ Бош котиби Исроилнинг Суриядаги ҳаво ҳужумларидан хавотирда

ASTANA. Kazinform – БМТ Бош котиби Антониу Гутерриш сўнгги пайтларда Сурия суверенитети ва ҳудудий яхлитлигининг кенг миқёсда бузилишидан “чуқур хавотир” билдирди ва мамлакатдаги барча томонларни зўравонликларни камайтиришга чақирди. Бу ҳақда унинг расмий вакили Стефан Дюжаррик пайшанба куни бўлиб ўтган кундалик брифингда маълум қилди, деб хабар беради Синьхуа ахборот агентлиги.

“Бош котиб, айниқса, Исроил томонидан Суриянинг бир қанча ҳудудларида амалга оширилган юзлаб ҳаво ҳужумларидан хавотирда ва мамлакатдаги барча жабҳаларда зўравонликни зудлик билан камайтириш зарурлигини таъкидлайди”, – деди у.

Антониу Гутерриш 1974 йилда имзоланган қўшма келишув ҳали ҳам амалда эканлигини эслатиб, ушбу ҳужжатга зид бўлган барча ҳаракатларни қоралади. У келишув томонларини ўз мажбуриятларини бажаришга, жумладан, қуролсизланиш зонасида ноқонуний аралашувни тўлиқ тўхтатишга ҳамда Голан тепаликларида ўт очишни тўхтатиш режими ва барқарорликка путур етказувчи ҳар қандай ҳаракатлардан тийилишга чақирди.

Стефан Дюжаррикнинг сўзларига кўра, Бош котиб тезкор ўзгаришлар даврида жамоат тартибини сақлаш ва Сурияда ишончли, тартибли ва инклюзив ўтиш механизмларини қўллаб-қувватлаш зарурлигини таъкидлади.