Бельгияда Tomorrowland электрон мусиқаси фестивали бош саҳнаси ёниб кетди

ASTANA. Kazinform – Фестиваль бошланишига бир кун қолганда Tomorrowland фестивалининг бош саҳнаси ёниб кетди.

Бельгияда рўй берган ёнғин оқибатида Tomorrowland электрон мусиқаси фестивалининг бош саҳнаси атиги бир ярим соат ичида бутунлай йўқ бўлди.

Tomorrowland — Бельгиянинг Бом шаҳрида ўтадиган жаҳонга машҳур электрон мусиқа фестивали. У илк бор 2005 йили ташкил этилган ва шундан бери дунёдаги энг йирик ва оммабоп мусиқа тадбирларидан бирига айланган. Фестиваль одатда 3 кун давом этади. Жорий йилги фестиваль 18 июлда бошланиши керак эди.

Ёнғин чоршанба куни тахминан соат 18:00 атрофида бошланган, деб хабар қилмоқда маҳаллий оммавий ахборот воситалари. Ҳодиса сабаби ҳозирча аниқ эмас.

Фестиваль ташкилотчилари билдиришича, ҳеч ким жабрланмаган ва фестиваль режа бўйича ўтади.

“Биз ижобий кайфиятдамиз, барча кучимизни тўплаб, ажойиб фестиваль ташкил қиламиз. Аммо афсуски, бош саҳна бўлмайди. Фестиваль кемпинги эртага одатдагидек очилади”, — дейди ташкилотчилар.

«Het Laatste Nieuws» газетасининг ёзишича, бош саҳнада ўрнатилган пиротехник қурилмалардан бири номуваффақ ишлаган бўлиши мумкин. Фестивальнинг якуний қисмида, одатда, фейерверк намойишлари ўтказилади.

Келаси жума куни нидерландлик дижей Мартин Гаррикс бош саҳнада чиқиш қилиши керак эди, шанба куни эса мусиқачи Ники Ромеро саҳнада чиқиши режалаштирилган эди. Ҳозир ташкилотчилар уларнинг қаерда чиқишини қайта кўриб чиқишга мажбур.