Астана шаҳрида робототехника бўйича халқаро чемпионатда 134 жамоа иштирок этмоқда
ASTANA. Kazinform — 2025 йил 13 майда Астана шаҳрида робототехника бўйича «Robotek Grand Tournament» халқаро чемпионати бошланди.
Ушбу мусобақа Қозоғистон ва дунёда ўсмирлар учун робототехника бўйича энг йирик мусобақалардан бири сифатида эътироф этилган.
Тўрт йил ичида «Robotek Grand Tournament» миллий IT брендига айланди ва унинг барча қоидалари маҳаллий интеллектуал мулкка асосланган.
Чемпионат мамлакатимизнинг 17 вилоятидан саралаш турнирлари ғолибларини жамлади. Бу йил танловда илк бор АҚШ делегацияси иштирок этяпти. Бундан ташқари, Болгария, Озарбайжон, Молдова, Ўзбекистон, Қирғизистон, Тожикистон каби давлатлардан 25 дан ортиқ хорижий делегациялар ташриф буюрган.
Мусобақада жами 9 ёшдан 17 ёшгача бўлган 350 дан ортиқ мактаб ўқувчилари (шундан 40 нафарга яқин хорижлик иштирокчилар) 134 та жамоада, 270 дан ортиқ роботлар етти хил тоифада ўзаро куч синашмоқда.
Чемпионат доирасида ҳар бир йўналиш бўйича ғолиб ва совриндорлар кубок ва фахрий ёрлиқлар билан тақдирланади. Бундан ташқари, “Энг яхши қишлоқ жамоаси”, “Энг яхши хорижий жамоа”, “Энг яхши муҳандислик ечими” каби махсус номинациялар бўйича ҳам мукофотлар тақдим этилади.
Танлов якунига кўра, икки нафар ғолиб Қозоғистон-Британия техника университетининг Ахборот технологиялари ва инжиниринг мактаби таълим гранти, шунингдек, Алмати энергетика ва коммуникациялар университети гранти билан тақдирланади.
Чемпионат Астана шаҳар маъмурияти ва “Дарин” республика илмий-амалий маркази ҳамкорлигида мамлакатимиздаги STEM-таълим ва робототехника соҳасида энг муваффақиятли компаниялардан бири бўлган «Robotek» компанияси томонидан ташкил этилган.
Эслатиб ўтамиз, 2023 йил ноябрь ойида Панамада бўлиб ўтган World Robot Olympiad халқаро мусобақасида «Robotek» компаниясининг икки жамоаси шоҳсупага кўтарилиб, мамлакат шарафини қўлга киритган эди.
