Аргентинадаги намойишда 150 киши ҳибсга олинди

ASTANA. Kazinform – Буэнос-Айрес марказидаги норозилик намойишида полиция 150 кишини ҳибсга олди.

Бу ҳақда Аргентина хавфсизлик вазири Патрисия Буллрич LN+ телеканалига берган интервьюсида маълум қилди, деб ёзади Report.

Унга кўра, 15-17 нафар полициячи жароҳатланган.

“Ушбу намойишга келганларнинг аксарияти мухлислар, қолганлари ўлдиришга тайёр бўлганлар”, – деди у.

12 март куни Аргентина пойтахти марказидаги конгресс биноси ёнида норозилик намойиши бўлиб ўтган. Унда яшаш шароитини яхшилашни талаб қилган пенсионерлар ва уларни қўллаб-қувватлаш учун келган футбол мухлислари иштирок этган.

Майдон ва яқин кўчаларда 2000 га яқин одам тўпланиб, нафақанинг камлигига ва яшаш нархининг юқорилигига норозилик билдиришди.

Йиғилганлар дарҳол полиция билан тўқнашиб кетишган ва вазият тез орада тартибсизликларга улашган. Ёшлар полиция ходимларига таёқ, шиша ва тош отишган. Полиция кўздан ёш оқизувчи газ ишлатган ва сув пуркаган. Намойишчилар баррикадалар ўрнатиб, полиция машиналари ва ахлат қутиларини ёқиб юборишга ҳаракат қилишган.