АҚШдаги сел оқибатида ҳалок бўлганлар сони 80 нафарга етди

ASTANA. Kazinform – Техас штатида рўй берган кучли сел оқибатида камида 80 киши, шу жумладан 28 нафар бола ҳалок бўлди, деб хабар беради BBC.

Керн округи шерифи Ларри Лита якшанба куни кечқурун матбуот анжуманида округда 68 киши ҳалок бўлганини (40 катта ёшли ва 28 бола) тасдиқлади.

CNN телеканали маҳаллий расмийларга таяниб, Техаснинг яна беш округида 12 киши ҳалок бўлганини маълум қилди.

Штатнинг бир қатор ҳудудларида фавқулодда ҳолат эълон қилинди: кўплаб йўллар вайрон бўлган, телефон алоқалари ишламайди. Яна 41 киши, жумладан 10 нафар қиз бедарак йўқолган деб эълон қилинди.

Ҳалок бўлган ва йўқолган болалар Гуадалупе дарёси бўйида, Керрвилл шаҳри яқинида жойлашган Camp Mystic номли қизлар учун мўлжалланган христианча ёзги лагерда дам олаётган эдилар. Ёмғирдан кейин дарё ташиб кетиб, уларни соҳилдан олиб кетган.

АҚШ президенти Дональд Трамп ўз маъмурияти Техас расмийлари билан яқин ҳамкорликда иш олиб бораётганини маълум қилди. Унинг топшириғига биноан, АҚШнинг Миллий хавфсизлик вазири Кристи Ноэм Техасга етиб борди.

Матбуот анжуманида Кристи Ноэм президент Трамп сел оқибатидаги ҳалок бўлиш ҳолатларидан қаттиқ қайғуга тушганини, у ва Мелания Техас аҳолиси билан бирга қайғураётганини маълум қилди. Президент федерал ҳукуматнинг барча ресурсларини қидирув-қутқарув ишларига сафарбар этишга тайёр эканини билдирган.

Кристи Ноэмнинг сўзларига кўра, Фавқулодда вазиятлар бўйича федерал агентлик (FEMA) юқори тайёргарлик ҳолатида қолмоқда ва қутқарув ишларини тўлиқ қўллаб-қувватлаш, хусусан, самолётлар ва вертолётлар орқали ёрдамни ўз вақтида етказишда давом этади.

АҚШда Мустақиллик куни муносабати билан режалаштирилган байрам тадбирлари бекор қилинди.

Президент Дональд Трамп Техасдаги воқеани “даҳшатли” деб атади. Оқ уй штатга қўшимча ёрдам кўрсатишга ваъда берди.

Трамп Техасда расман фавқулодда ҳолат эълон қилди.