АҚШ зарбаларидан кейин Эрон билан учрашишга тайёр - Марко Рубио
Рубио «Face the Nation with Margaret Brennan» мавзусида нутқ сўзлаб, Эронни дипломатияни давом эттиришга чақирди ва АҚШнинг Эронга қарши кейинги ҳужумлар учун ҳозирча режалари йўқлигини айтди.
Рубионинг таъкидлашича, АҚШ миссияси "Эронга ҳужум эмас, Эрон халқига ҳужум эмас. Бу режимни ўзгартириш ҳаракати эмас эди. Бу уларнинг ядровий қурол амбициялари билан боғлиқ учта ядровий иншоотни йўқ қилиш эди ва бу кеча амалга оширилди".
"Энди нима бўлиши Эроннинг бундан кейин нима қилишга қарор қилишига боғлиқ бўлади. Агар улар дипломатия йўлини танласа, биз тайёрмиз. Биз улар учун, Эрон халқи учун фойдали ва дунё учун фойдали бўлган келишувга эришишимиз мумкин. Агар улар бошқа йўлни танласа, бу асоратли бўлади", - деди Марко Рубио.
Рубио Президент Трамп ҳамон дипломатик йўлни маъқуллашини таъкидлаб, АҚШ Эронни зарбалар олдидан ҳам ядровий қуролга оид амбицияларидан воз кечиш бўйича келишув тузишга ундаганини таъкидлади.
“Агар улар қўнғироқ қилиб, “учрашмоқчимиз, шу ҳақда гаплашамиз” деса, биз бунга ҳозир ҳам тайёрмиз”, -деди давлат котиби.
Шу билан бирга, Рубио Эронни ҳаётий муҳим Ҳормуз бўғозини ёпиш Эрон режими учун “ўз жонига қасд қилиш” ҳаракати бўлишидан огоҳлантирди.
“Бу [Эроннинг] ўз жонига қасд қилиш ҳаракати бўларди, чунки улар шундай қилсалар, бутун дунё уларга қарши чиқади, деб ўйлайман”, - деди Марко Рубио.
Эслатиб ўтамиз, аввалроқ Эрон ТИВ раҳбари Москвага “бир қатор музокаралар ўтказиш учун” келгани хабар қилинганди.
