АҚШ ҳаво кучлари Яманга ҳаводан зарба бермоқда
ASTANA. Kazinform – АҚШнинг яманлик ҳусийларга қарши ҳарбий операцияси 11 кундан бери давом этмоқда, деб хабар беради Kazinform ахборот агентлигининг махсус мухбири.
Чоршанба куни Ямандаги ҳусийларга алоқадор манбалар АҚШ Саада ҳудуди ва унга қўшни Амран провинциясига 17 та ҳаво ҳужуми уюштирганини хабар қилди.
Ҳусийларнинг “Ансаруллоҳ” гуруҳи сайти АҚШ ҳаво кучлари “фуқаролик мулкига моддий зарар етказувчи тажовузкор ҳаво ҳужумларини амалга оширганини” билдирган, бироқ жабрланганлар ҳақида ҳеч қандай маълумот бермаган.
Ҳусийларга алоқадор Al Masirah телеканалининг хабарига кўра, ҳаво зарбаларининг бир қисми Шарқий Саада ва ал-Салим ҳудудларини нишонга олган бўлса, қолган иккитаси Амран провинциясининг шимоли-ғарбидаги Суфьян ҳудудига йўналтирилган.
Al Jazeera маълумотига кўра, сешанба куни кечқурун АҚШ қирувчи самолётлари Сааданинг ғарбидаги Сахар ҳудудига ҳам беш марта зарба берган.
Бунга жавобан ҳусийлар АҚШ ва Исроилнинг ҳарбий объектларига ҳужум қилганини билдирди.
Чоршанба куни ҳусийлар вакили Яҳё Сари Яманнинг қуролли кучлари икки ҳарбий операцияни амалга оширганини маълум қилди. Унинг сўзларига кўра, ҳусий жангарилари Қизил денгиздаги АҚШ ҳарбий кемаларига, жумладан USS Harry Truman авиаташувчисига ҳужум қилган ҳамда Исроилнинг Тель-Авивдаги ҳарбий объектларига бир неча дрон йўллаган.
Матбуот котиби ҳусийлар “америкалик агрессияга” қарши курашни давом эттиришини ва “тезкор жавоб” қайтарашини таъкидлади.
Шунингдек, у ҳусийлар Яманнинг стратегик сув ҳудудларида Исроил кемаларининг ҳаракатини тўсишда давом этишини ҳамда “агрессия тўхтатилмагунича ва Ғазо секторининг блокадаси олиб ташланмагунича исроиллик душманга қарши операцияларни давом эттиришини” таъкидлади.
АҚШнинг Ямандаги ҳусийчи исёнчиларига қарши ҳарбий операцияси президент Дональд Трампнинг фармони билан бошланган бўлиб, Сана шаҳрига ва унинг шимолий қалъаси Саадага уюштирилган ҳужумларга 11 кун бўлди. Бу АҚШнинг Яқин Шарқдаги, айниқса Дональд Трамп президентликка келганидан бери амалга оширилган энг йирик ҳарбий операцияларидан бири ҳисобланади.
Эслатиб ўтамиз, 15 март куни Вашингтон Ямандаги ҳусийларга қарши ҳарбий операция бошлангани ҳақида эълон қилган эди. АҚШ расмийлари бу гуруҳ Қизил денгиз ва Аден кўрфазидаги асосий юк ташиш йўлларида кемаларга ҳужум қилишни тўхтатмагунича, куч ишлатишда давом этишини айтган эди.
Ҳаво ҳужумлари натижасида ҳусийларнинг юқори мартабали раҳбарлари ҳалок бўлган, Яманнинг соғлиқни сақлаш вазирлиги эса 53 кишининг ўлими ва 98 кишининг яраланганини хабар қилган. Ҳусийлар вакили Наср ад-Дин Омернинг сўзларига кўра, ҳаво ҳужумлари қурбонларининг аксарияти аёллар ва болалардир.
Ҳусийлар ҳукумати кучлари агрессия тўхтатилмагунича ва Ғазо секторига қўйилган блокада олиб ташланмагунича Исроил кемаларининг ҳаракатини тўсишда давом этишини ва Ғазо секторини қўллаб-қувватлашни давом эттиришини билдирган.
Yemen Data Project маълумотларига кўра, АҚШнинг бир ҳафталик бомбардимони натижасида камида 25 нафар тинч аҳоли вакили, жумладан тўрт бола ҳалок бўлган. Мустақил маълумотлар лойиҳасига кўра, етти кун ичида амалга оширилган 38 та ҳаво ҳужуми натижасида камида 28 тинч аҳоли вакили яраланган. Ташкилотнинг қайд этишича, АҚШ ва Буюк Британия томонидан 2024 йил январидан жорий йилнинг январь ойигача амалга оширилган ҳужумларга нисбатан АҚШнинг янги ҳарбий операцияси натижасида биринчи ҳафтадаёқ кўпроқ одам ҳалок бўлган.
