2023 йилда Қозоғистон Миллий жамғармасидан республика бюджетига 2,2 трлн тенге йўналтирилади

ASTANA. Kazinform - «Қозоғистон Республикаси Миллий жамғармасидан 2023-2025 йилларга мўлжалланган кафолатланган трансферт тўғрисида»ги қонун лойиҳаси Парламент Мажилисининг ялпи мажлисида маъқулланди, деб хабар бермоқда Kazinform мухбири.

«Қонун лойиҳаси Бюджет кодексининг янги талабларини ҳисобга олган ҳолда ишлаб чиқилган. Миллий жамғармадан кафолатланган трансферт миқдори янги бюджет қоидасига мувофиқ, нефтнинг пасайтирилган нархини ҳисобга олган ҳолда белгиланди ва кутилганидек, нефт сектори ташкилотларидан Миллий жамғармага тўланадиган тўғридан-тўғри солиқлар миқдоридан ошмайди. Шу билан бирга, қонун лойиҳасида нефтнинг бир баррелининг пасайтирилган нархи 2023 йилда 48,9 АҚШ доллари, 2024-2025 йилларда эса 42,2-40,3 АҚШ доллари даражасида белгиланди. Шуни инобатга олган ҳолда, республика бюджетига кафолатланган трансферт миқдори 2023 йилда 2,2 триллион тенге, 2024 йилда 2 триллион тенге ва 2025 йилда 1,9 триллион тенге миқдорида белгиланди»

, — деди ҚР Миллий иқтисодиёт вазири Алибек Қуантиров.

Унинг сўзларига кўра, режалаштирилган даврда тегишли тамойилларнинг қўлланилиши Миллий жамғарманинг валюта маблағларини 2023 йилда 66,7 миллиард АҚШ долларига, 2024-2025 йилларда эса 78,8 – 93,2 миллиард долларга оширишга хизмат қилади.

«Қонун лойиҳасининг ўз вақтида қабул қилиниши режалаштирилган даврда республика бюджети балансини та’минлаш ва шу билан бирга Миллий жамғарманинг барқарорлаштириш функсиясини амалга ошириш имконини беради»

, — деди вазир.

Муаллиф: Руслан Ғаббасов