1 триллион тенге инвестиция: Ақтўбе вилоятида қандай лойиҳалар амалга оширилмоқда
ASTANA. Kazinform – Жорий йилнинг 11 ойида Ақтўбе вилояти иқтисодиётига 764 миллиард тенге инвестиция киритилди. Вилоят ҳокими Асхат Шахаров вилоятдаги инвестиция лойиҳалари ҳақида батафсил маълумот берди.
“Вилоятга сармоя жалб этиш борасида тизимли ишлар амалга оширилмоқда. Жорий йилнинг 11 ойида вилоят иқтисодиётига 764 миллиард тенге сармоя киритилиб, биринчи ярим йилликда 175 миллион АҚШ доллари миқдорида хорижий инвестиция жалб этилди”, — деди Асхат Шахаров вилоятнинг ижтимоий-иқтисодий ривожланиши ҳақидаги маърузасида.
Ҳокимнинг таъкидлашича, вилоятда макроиқтисодий ҳолат барқарор, иқтисодий ўсиш 106 фоизга етди.
“Ақтўбе” саноат зонасида металлургия, машинасозлик, кимё саноати соҳаларида лойиҳалар амалга оширилмоқда. Шунингдек, Алия Молдағулова номидаги халқаро аэропорт негизида умумий майдони 858 гектар бўлган махсус иқтисодий зона (МИЗ) ташкил этиш бўйича ишлар фаол олиб борилмоқда. Жорий йилда вилоятда 6 та инвестиция лойиҳасини амалга ошириш режалаштирилган. Шу билан бирга, «ERG» компаниясининг “Болашақ” конини қуриш (1-босқич), “Ақтобе мис компанияси” МЧЖ “Авангард” конини очиш ва ўзлаштириш” ва “АҚМЭЗ” МЧЖ” мойли ўсимликларни қайта ишлаш бўйича дон омбори қуриш” лойиҳалари ишга туширилди. Қолган 3 та лойиҳа бўйича ишлар олиб борилмоқда”, – дейди вилоят ҳокими.
Шунингдек, Асхат Шахаров 2025 йилда 1 триллион тенге сармоя жалб этиш, 1 мингдан ортиқ иш ўрни яратиш, 10 та инвестиция лойиҳасини ишга тушириш режалаштирилганини айтди.
“Ҳар бир сармоявий лойиҳа шахсан менинг назоратим остида бўлиб, вилоят сармоявий салоҳиятини ривожлантириш бўйича барча зарур чора-тадбирлар кўрилмоқда”, – деди вилоят ҳокими.
